Temë: Shoqatat e dalura nga lufta e Thaçit për interesa personale

Të ashtuquajturat “Shoqata të dalura nga lufta e UÇK-së”, respektivisht udhëheqjet e tyre të ngushta, me reagimin e tyre të sotshëm ndaj Lëvizjes VETËVENDOSJE! vetëm sa e kanë përforcuar mendimin tonë se, në të vërtet, ato nuk kanë mbetur gjë tjetër veçse Shoqata të dalura nga lufta e Hashim Thaçit për interesa personale. Përkundër anëtarësisë së thjeshtë dhe luftëtarëve të devotshëm të lirisë, familjet e të cilëve jetojnë në kushte të rënda ekonomike, udhëheqësit e këtyre shoqatave nuk dallojnë shumë nga shoku i tyre kryeministër i cili i ka futur në qeveri.

Në këtë reagim, të cilit do t’ia kish lakmi çdo zyrtar i UNMIK-ut, duke aluduar në Lëvizjen VETËVENDOSJE!, thuhet se gjithçka ndodh në protesta në të cilat nuk është lajmëruar policia, përgjegjësinë e marrin organizatorët. Ky formulim e nxjerr udhëheqjen e këtyre shoqatave në të njëjtën anë kriminale me vrasjet e UNMIK-ut më 10 shkurt 2007. Ky qëndrim i bën fajtorë vetë Arben Xheladinin dhe Mon Balajn për vrasjet që iu bënë atyre nga UNMIK-u dhe me bekimin e Grupit Negociator të Kosovës, pjesë e të cilit ishte edhe shefi i shoqatave, Hashim Thaçi.

Përveç kësaj, formulimi në fjalë qëndron në anën e kriminalizimit që EULEX-i është përpjekur t’ia bëjë Albin Kurtit. Apo njëfarë versioni i stërkequr i deklaratës së Jakup Krasniqit se Albin Duhet të jep “përgjegjësi morale” për 10 shkurtin. UNMIK-u që vetë kishte vrarë filloi persekutimin e Albin Kurtit. Kurse tash këtë rast e ka rihapur EULEX-i. Shoqatat e Hashim Thaçit nuk kanë bëzajtur gjatë këtij procesi politik. Por ato menjëherë janë hallakatur pas ndërhyrjes së EULEX-it në pronat e ministrit Fatmir Limaj. Mjafton ky anim krejtësisht joparimor për ta kuptuar ku pi ujë udhëheqja e Shoqatave. Kur po ndiqej Albini dëgjonim për “sundim të ligjit”. Kur po hetohet Fatmir Limaj “u kall dynjaja”.

Tash kur EULEX-i ka filluar t’ua tregojë dhëmbët shokëve të korruptuar të udhëheqësve të Shoqatave, tash ka ardhur koha e riaktivizimit të patriotizmit, kërcënimit të EULEX-it dhe integritetit territorial të Kosovës. Kur EULEX-i nuk po i prekte politikanët aktualë, gjithçka ishte në rregull për Shoqatat. Ky është fakt i mjaftueshëm se udhëheqjet e këtyre Shoqatave i kanë instrumentalizuar organizatat të cilat i udhëheqin për interesa të politikës zyrtare. Kurse anëtarësia e thjeshtë po bëhet mish për top për interesat e Hashim Thaçit.

Lëvizja VETËVENDOSJE! i thërret Shoqatat le të mos frikësohen nga hetimet e EULEX-it. Asnjë shok i tyre politikan nuk do të arrestohet. E tëra po bëhet që bashkë me dosje në dorë t’i dërgojnë politikanët në negociata me Serbinë për më shumë koncesione në kurriz të Kosovës. Dhe ata, meqë janë të korruptuar deri në maje të hundës, do të shkojnë dhe do të pranojnë gjithçka t’iu kërkohet. E Shoqatat, nëse përnjëmend janë Shoqata të UÇK-së, duhet të distancohen nga ata që e kanë shitur luftën çlirimtare për interesa personale dhe që e kanë çarmatosur e shkatërruar UÇK-në.