Temë: Krijohet Agjencia e Formimit Profesional të Kualifikimeve

Miratohet vendimi

Këshilli i Ministrave miraton vendimin për krijimin e Agjencisë Kombëtare të Arsimit, Formimit Profesional dhe Kualifikimeve, në vijim (AKAFPK), si institucion juridik, publik dhe buxhetor, në varësi të Ministrisë së Arsimit dhe Shkencës.

AKAFPK-ja ka objekt kryesor të veprimtarisë së saj krijimin e një sistemi unik të kualifikimeve profesionale, të njohura në nivel kombëtar dhe ndërkombëtar, si dhe zbatimin e Kornizës Shqiptare të Kualifikimeve. Për realizimin e këtij objekti, Agjencia Kombëtare e Arsimit, Formimit Profesional dhe Kualifikimeve:

harton plane dhe programe për zhvillimin e sistemit të arsimit dhe formimit profesional (AFP), që miratohen nga Ministria e Arsimit dhe Shkencës dhe nga Ministria e Punës, Çështjeve Sociale dhe Shanseve të Barabarta; harton programe për realizimin e politikave për zbatimin e Kornizës Shqiptare të Kualifikimeve. Po ashtu agjencia harton programe për zbatimin e sistemit të sigurimit të cilësisë nga institucionet ofruese të AFP-së;

mban regjistrin kombëtar të kualifikimeve profesionale.

AKAFPK-ja është një ofrues shërbimi për Ministrinë e Arsimit dhe Shkencës dhe Ministrinë e Punës, Çështjeve Sociale dhe Shanseve të Barabarta. Struktura dhe organika e AKAFPK-së miratohen me urdhër të Kryeministrit, sipas propozimit të ministrit të Arsimit dhe Shkencës. Ministri i Arsimit dhe Shkencës miraton statutin dhe rregulloren e funksionimit të AKAFPK-së.

Numri i punonjësve të Agjencisë Kombëtare të Arsimit, Formimit Profesional dhe Kualifikimeve të jetë brenda numrit të përgjithshëm të punonjësve të sistemit të Ministrisë së Arsimit dhe Shkencës.