Sipas rezultateve të para jozyrtare, koalicioni i shqiptarëve në Luginën e Preshevës ka fituar një deputet, ndërsa paraprakisht fitore në Preshevë ka arritur PVD e Riza Halimit.
Në bazë të të dhënave të para të bazuara në shtabet partiake, Riza Halimi, kandidati i koalicionit të shqiptarëve në Luginën e Preshevës ka fituar si deputetë në këtë zonë.

Kjo konfirmohet edhe nga organizata për monitorimin e zgjedhjeve CESID, e cila bën të ditur se shqiptarët në Luginën e Preshevës kanë fituar një mandat deputeti.

Rezultatet paraprake bëjnë të ditur se në planin lokal në komunën e Preshevës, shumicën e votave e ka fituar Partia për Veprim Demokratik (PVD) edhe atë 5.422 vota, në vend të dytë është Partia Demokratike Shqiptare (PDSH) ka fituar 4.417 vota, Bashkimi Demokratik i Luginës (BDL) ka fituar 1.980 vota, Grupimi Qytetar PDSH-BDL ka fituar 1.600 vota, Lëvizja Kombëtare Shqiptare (LKSH) rreth 600 vota.

Ende nuk dihet se si janë rezultatet e para në komunën e Bujanocit, mirëpo jozyrtarisht bëhet e ditur se shumicën e votave e ka fituar Partia për Veprim Demokratik (PVD), ndërsa pas saj radhitet koalicioni i partive serbe. Në vend të tretë është Partia Lëvizja e Progresit Demokratik.